LXX
Li quens Rollanz Gualtier de l’Hum apelet :
« Pernez mil Francs de France nostre tere,
« Si purpernez les destreiz e les tertres,
« Que l’Emperere nisun des soens n’i perdet. »
Respunt Gualtiers : « Pur vus le dei bien faire. »
Od mil Franceis de France la lur tere,
Gualtiers desrenget les destreiz e les tertres.
N’en descendrat pur malvaises nuveles,
Enceis qu’en seient set cenz espées traités.
Reis Almaris, de l’ règne de Belferne,
Une bataille lur livrat le jur, pesme. Aoi.
LXXI
En Rencesvals si est Carles entrez.
L’anz-guarde fist li dux Ogiers, li ber :
De cele part n’ estoet il rien duter.
Rollanz remeint pur les altres guarder,
Od Olivier e tuz les duz Pers,
Des Francs de France vint milie bacheler.
Bataille avrunt, or les succuret Deus !
Guenes le sout, li fel, li parjures
L’aveir en prist, que il l’ont recelet.Aoi.
LXXII
Halt sunt li pui e li val tenebrus,
Les roches bises, li destreit merveillus.
Le jur passèrent Franceis à grant dulur :
De quinze liwes en ot hum la rimur.
Pois que il vienent à la Tere majur,
Virent Guascuigne la tere lur seignur.
812. Reis Almaris. Voir la suite de cet épisode après le vers 1411.
