« Sa rere-guarde avrat detrès sei mise ;
« Iert i sis niés, li quens Rollanz, li riches,
« E Oliviers en ki tant il se fiet ;
« Vint milie Francs unt en lur cumpaignie,
« E vus aiez vostre grant ost banie.
« De voz païens lur enveiez cent milie ;
« Une bataille lur i rendent cil primes :
« La gent de France iert blecée e blesmie ;
« Ne l’ di pur ço des voz n’iert là martirie.
« Altre bataille lur livrez de meïsme.
« De quel que seit Rollanz n’estoerrat mie.
« Dune avrez faite gente chevalerie ;
« N’avrez mais guère en tute vostre vie. »Aoi.
XLIX
« Ki purreit faire que Rollanz i fust morz,
« Dunc perdreit Carles le destre braz de l’ cors ;
« Si remeindreient les merveilluses oz,
« N’asemblereit Carles si grant esforz ;
« Jamais el’ chief n’avrat curune d’or ;
« Trestute Espaigne remeindreit en repos. »
Quant l’ot Marsilies, si l’ ad baisiet cl’ col ;
Pois, si cumencet à uvrir ses trésors.Aoi.
L
Ço dist Marsilies : « Qu’en parlerai jo mais ?
« Cunseilz n’est pruz dunt hum soürtet n’ait :
« La mort Rollant me jurez entresait
« En rere-guarde que jo le œuverai.
« De sur ma lei le vus afierai,
« Se je le trois, que jo m’i cumbatrai. »
Ço respunt Guenes : « Issi seit cum vus plaist. »
Sur les reliques de s’espée Murglais
La traïsun jurât ; s’i s’est forsfaiz. Aoi.
LI
Un faldestoel i ont d’un olifant.
Suz une olive, desur un escut blanc,
