E dist à l’ Rei : « Guenes ad dit folie.
« Tant vus ad dit nen est dreiz que plus vivet ;
« Livrez le mei, j’ en ferai la justise. »
Quant l’oït Guenes, l’espée en ad brandie ;
Vait s’apuier suz le pin à la tige. Aoi.
XLI (??)
En Sarraguce meinent mult grant irur.
Iloec i ont un noble punneür,
Ki riches fust, filz à un almaçur ;
Mult saivement parlat pur sun seignur :
« Bels sire reis, jà n’en seis en pour ;
« Vei de l’ felun cume il muet culur. » Aoi.
XLII
Enz el’ vergier s’en est alez li Reis,
Ses meillurs humes enmeinet ensembl’ od sei ;
E Blancandrins i vint à l’ canut peil,
E Jurfaleus k’ est sis filz e sis heirs.
E l’Algalifes sis uncles e sis fedeilz.
Dist Blancandrins : « Apelez le Franceis,
« De nostre prud m’ad plevie sa feid. »
Ço dist li Reis : « E vus, l’i ameneiz. »
Guenelun prist par la main destre as deiz,
Enz el’ vergier l’enmeinet jusqu’à l’ Rei.
Là purparolent la traïsun seinz dreit. — Aoi.
XLIII
« Bels sire Guenes, » ço li ad dit Marsilies,
« Jo vus ai fait alques de legerie,
« Quant par férir vus demustrai grant ire.
« Faz vus en dreit par cez pels sabelines :
« Fut en cest jur l’uevre faite e cumplic.
500. Lacune comblée. Voir la Note du V. 318,
