choses dessus dictes souffirent bien en moy coutumier en plours, car certes se ie di tout quant que ie pourroye comparer a ce seulement que iay fait. Hélas a qui ay ie pechie ? dieu trestout omnipotent ay deshonnoure, ha sire dieu tout puissant ne tabrive sur moy constraint, ou me muceray ie, qui me delivrera de tes mains, dont aray ie conseil ne dont aray ie salut, certes de nul fors de toy. Doulz vray et puissant dieu ie esperay en toy que ie crains regarde sire moy meschin suppliant tu qui mas fourme, qui es mon sauveur et mon redempteur ne me condempne sire car tu mas cree par ta bonté, ne perisse ton euvre par mes iniquités. Ie te pri trespiteux ne decipe ma mauvaistie ce que a fait ta omnipotent bonté, recognois tresbenigne ce que tien est et oste ce que est dautruy. Sire sire ayez mercy de moy car temps est davoir mercy, pour ce que tu ne me condempnes quant de iugier sera venuz le temps, se tu recoys sires moy dedanz le saing de ta misericorde, car pour moy ne sera plus estroit sire et tresdesire seigneur recoy moy par quoy avec tes esleuz tu seul ie aime et en toy me glorifie.
XXV
Sire, doulz Dieu, a toy ie me rent comme cil qui na nul autre refuge ne autre espérance fors en toy combien que ie ne soye dignes a lever les oyeulx pour toy prier. Certes ou moins sui ie dignes de ceulz en plourant aveugler, car cest confusion a ma pensee de prier par vergoigne de tresmauvaise conscience, droituriere chose est que soit confondue par tresgrande douleur de paoureuse tristece regardant mes euvres et mes pechiez tres ors et innumerables ; terreur horrible, inconsolable tristour, venez sur moy, perturbez moy, enveloppez moy et mopprimes, car nulle vergoigne ay offendu Dieu. Certes raisonnable chose est que ie qui suy coulpable sente les tourmens lesquielx iay meris, et que ie apreigne ce que iaray a souffrir ; bien est rayson que ie aye longue penitance que tant longuement ay pechie et demoure en mes pechiez et en mondices consolation soulas leesce seurte, ie ne vous vueil point ainz vous renye se non que par pardonnance de mes pechiez retournissiez a moy, ie cogite ce que iay fait en partie, maiz non pas tant comme
