Leur pel est moult chaulde quand elle est bien conreiée et prise en bonne sayson ; quar nul froit ne pluye ne puet entrer dedans se le poill est dehors. Et, en mes montainhes, en sont plus vestuz les gens que ne sont d’escarlate et en sont aussi leurs chauces et leurs sollers ; quar de cieux bestes y a il trop. Et en une veue, j’ay vu l’iver que on en veoit plus de cinq cents. Et tant pour la char comme pour la pel chescun paysan y est bon veneur de cela, quar il n’y a pas trop grant mestrise de les prendre. Toutes voyes quand je parleray du veneur, diray je comment ou les doit chassier. Leur char n’est pas trop saine, quar elle engendre fièvres pour la grant chaleur qu’ils ont : toutes voyes, quant ils sont en sayson, leur venoison salée est bonne à gens qui n’ont pas chair fresche ne de meilleure quant ils vuelent.
