du monde : l’une si est en gouster ; quar il a meilleur goust et mieulx assavoure et sent les bonnes herbes et feuilles et autres pastures qui li sont proufitables que ne fet homme du monde ne beste qui soyt ; l’autre il a plus de sagesce et de malices en garantir sa vie que nulle autre beste ne homme ; quar il n’y a nul si bon veneur qui peust penser les malices et subtilitez que un cerf scet fere, ne n’est si bon veneur ne si bons chiens qui moult de fois ne faillent à prendre le cerf à force ; et ce est par son sens et par sa malice et par sa subtilité.
Quant aux biches, les unes sont brehainhes et les autres sont qui portent faons. De celles qui sont brehainhes commence leur sayson quant celle du cerf faut, et dure jusques en caresme. Biche qui porte faons, à matin quant ira à son embuschement, ne demourra jà avecques son faon ; mes le lera[1] bien loinh de luy et fiert[2] du pié et le fet couchier, et là le faon demourra touzjours jusques tant que elle se relève pour viander, et lors l’appellera en son lengaige et il vendra à elle. Et ce fet elle affin que se on la chassoit, que son faon se sauvast et qu’il ne fust pas trouvé près d’elle.
Les cerfz ont plus de povoir de fuyr dès l’entrée de may, jusques à la saint Jehan qu’ils n’ont en nul autre temps ; quar ilz ont renouvellé leur char, leur poill et leurs testes pour les nouvelles herbes et revenue de boys et de fruitz, et si ne sont pesans ; quar ilz n’ont pas encores refet leur gresse ne dedans ne dehors, ne leurs testes, et si en sont assés plus legiers et plus vistes ; mes de la saint Jehan deviennent ils pesans toujours plus jusque partout le mois d’aoust. Leur pel est moult bonne pour fère moult de choses quant elle est bien conrée[3] et prinse en bonne sayson. Les cerfz quant ilz sont près des haultes montainhes, descendent quand ce vient au temps du ruyt ès plaines,
