hors on li pourra oster le fic aux dois ou ès ongles, quar si on li touchoit de coutel on le pourroit afoller en manière que jamais n’alinheroit lisse ; et puis laver de bon vin tiède, et metre du miel et du sel, afin qu’il ne li revienhe, et retourner le vit dedans la pel comme devant ; et regarder chescune sepmaine que rien ne li en revienhe et touzjours ; oster, jusques tant qu’il soit bien sané. Aussi vient ès lisses fic en la nature et aucunefois les ont dehors et aucunefois les ont dedans ; et quant il est dehors, tiriez ès mains comme j’ai dit et li ostés, et s’il est dedens, li fetes bien ouvrir la nature aux dois à un autre et li tiriez dehors et li metez des choses suzdites. Ces deux curacions de quoy moult de chiens se perdent ne sèvent mie touz les veneurs.
Aussi ont les chiens aucunefois maladie qu’ils ne pevent pissier et s’en perdent. Et aussi qu’ils ne pevent chier et aussi s’en perdent. Et à celui que ne puet chier, prenez la rassine d’un choul et la bainhez en uille d’olives et li metés par la nature, mes que vous en laissiez dehors par où le puissiez tiriez arrière quant besoinh sera. Et se pour cela il ne garist, fetes li un cristère einsi que feriés à un homme, de mauves, de bletes, de mercuriel un poinh de chescune et de rute et d’enssens, et soit tout cuyt en eaue et metez du son dedenz et soit la dite yaue toute coulée et en ladicte couleure soit dissoult ij dragmes d’agret et de miel et sel et de uille d’olives et tout ensemble fetes li bouter par dedens le cul et chiera ; ou prenez v grains de catepusse[1] autrement appelée espurge et les pilés et destrempés à let de chièvre ou à brouet et en donnez au chien par la gorge et à la quantité d’un voirre.
Et se il ne peut pissier, prenez des fueilles de porreaux et de marrubre blanc, d’artemise[2] et de paritarie[3], de morsus galiné[4], d’orthie, et de fuielle de persil, et tant de l’une comme de
