Page:Furetière - Le Roman bourgeois.djvu/346

aiguille ; car le lendemain, en s’habillant, elle avoit mis sur sa toilette une aiguille de teste qui estoit d’or avec un petit rubis fin, dont elle se servoit pour accommoder ses cheveux. Charroselles (en badinant) s’en voulut curer une dent creuse ; mais comme il avoit la dent maligne, l’aiguille se rompit dès qu’elle y eut touché. Aussi-tost Collantine vomit contre luy plusieurs injures et reproches, entre lesquels elle n’oublia pas de luy reprocher le defaut dont sa dent estoit accusée. Charroselles, qui vouloit faire durer sa complaisance vingt-quatre heures du moins (c’estoit pour luy un grand effort), offrit de luy en apporter une autre plus belle, et il luy dit mesme qu’il luy en feroit donner une en present par quelque libraire, à qui il donneroit plustost à imprimer un de ses livres sans autre recompense. Vrayement, c’est mon (dit Collantine), vous me renvoyez là à de belles gens ; vous n’en avez jamais sçeu rien tirer, et puis, quand vous m’en donneriez cent, je ne serois pas satisfaite : je veux celle-là, et non point une autre ; j’en fais état à cause qu’elle vient de ma grand’mère, qui me l’a donnée à la charge de la garder pour l’amour d’elle. L’affection que j’ay pour ce bijou me fait souffrir des dommages et interests qui ne peuvent pas tomber en estimation. Et en mesme temps elle recommença à luy dire que c’estoit un mauvais ménager, qu’il la vouloit ruïner, qu’il lui avoit osté le plus pretieux joyau qu’elle avoit ; toutes lesquelles parolles ne s’en estant pas allées sans repliques et dupliques, la querelle s’échauffa si fort, que cela aboutit à dire qu’elle se vouloit separer. Et aussi-tost elle luy fit donner un exploit en separation de corps et de biens, que quelques-uns asseurent qu’elle avoit fait