chant qu’il y estoit, pour luy faire signer la minutte d’un inventaire qu’il venoit d’achever ; et outre le procès verbal de scellé qu’il tenoit en main, il avoit encore sous le bras un fort gros sac, contenant tous les papiers inventoriez, qui devoient estre deposez au greffe pour la seureté des vacations des officiers. Son arrivée fit faire trefve à ces deux parties plaidantes, et apres qu’il eut eu une petite audiance en particulier de Belastre, ce greffier (qu’on avoit appellé Volaterran, parce qu’il voloit toute la terre) donna son procès verbal à signer à ce venerable magistrat. Charroselles, qui fouroit son nez par tout, fut curieux de sçavoir ce que c’estoit, et s’estant baissé sous pretexte de ramasser un de ses gans, il leut au dos du cahier cette inscription :
Inventaire de Mythophilacte.
Comment (s’ecria-t’il aussitost) ! le pauvre Mythophilacte est donc mort ! Quoy ! cet homme qui a esté si fameux dans Paris, et par sa façon de vivre et par ses ouvrages ? Je m’asseure qu’on aura trouvé chez luy de belles curiositez. Si vous les desirez voir (dit le greffier assez civilement, contre l’ordinaire de ces messieurs, qui ne sont point accusez d’estre civils), vous n’en sçauriez trouver un memoire plus exact que cet inventaire que j’en ay dressé. Vous ne me sçauriez faire un plus grand plaisir (dit Charroselles). Et à moy aussi (dit de son costé Collantine), qui estoit ravie d’ouïr toute sorte d’actes et d’expeditions de justice. Belastre, qui estoit aussi bien aise d’entendre lire une piece intitulée de son nom, et qui croyoit se faire beaucoup valoir par ce moyen à Collantine, non seulement applaudit à cette curiosité, mais mesme, par l’authorité qu’il avoit sur le
