Page:Furetière - Le Roman bourgeois.djvu/247

déjeuner, les clercs qui avoient esté dans son estude, enfin tant de choses que Charroselles, convaincu de cette verité et confus de ce reproche, n’eut autre recours pour s’en sauver qu’à son impudence, et à luy soustenir hautement que tout cela estoit faux. Collantine en infera aussi-tost : J’ay donc menty ! et en mesme temps il y eut souflets et coups de poing respectivement donnez. Elle fut la premiere à souffleter et à crier : Au meurtre ! on m’assassine ! et quoy qu’elle fust la moins battuë, c’estoit elle qui se plaignoit le plus haut. Pour le pauvre Charroselles, il n’estoit que sur la deffensive ; et quoy que ce ne fust pas le respect du sexe qui le reteint (car il n’en avoit ny pour sexe, ny pour âge), neantmoins l’avantage n’estoit pas de son costé, car il n’estoit accoutumé qu’à mordre, et non point à souffleter ny à battre. Le plus plaisant fut que, parmy les voisins qui arriverent au secours, se trouva fortuitement le frere de Collantine, qui avoit hérité de l’office de sergent qu’avoit son pere. Quoy qu’il eust beaucoup d’affection pour elle, il se donna bien de garde de separer ces combatans, qui s’embrassoient fort peu amoureusement ; mais, disant aux assistans qu’il les prenoit à tesmoins, il escrivit cependant à la haste une requeste de plainte, et tant plus il les voyoit battre, tant mieux il rolloit. Le mal-heureux autheur fut donc obligé de s’enfuir, car tout le voisinage accouru se rua sur sa fripperie et le mit en aussi pitoyable estat qu’un oyson sans plume. Le sergent envoya querir vistement la justice ordinaire du lieu, dont sa sœur le querella fort, luy disant qu’il se meslast de ses affaires ; qu’elle sçavoit assez bien, Dieu mercy, les destours de la pratique pour ruiner sa partie de fonds en comble ; en un