histoire de mesme nature. Mais je ne suis pas asseuré qu’il vienne encore paroistre sur la scène, il faut maintenant qu’il fasse place à d’autres ; et, afin que vous n’en soyez pas estonnez, imaginez-vous qu’il soit icy tué, massacré, ou assassiné par quelque avanture, comme il seroit facile de le faire à un autheur peu consciencieux.
Si-tost que Vollichon eut rompu avec Nicodeme, il songea à conclure promptement l’affaire avec Jean Bedout. Il proposa des articles, sur lesquels il y eut bien plus de contestation qu’au premier contract : car, quoy que Nicodeme fust un grand sot, il ne laissoit pas d’estre estimé habille homme dans le palais, où ces qualitez ne sont pas incompatibles. De sorte que, quoy qu’il n’eust pas de si grands biens que son rival, on ne faisoit pas tant de difficultez avec luy qu’avec Jean Bcdout, qui estoit beaucoup plus riche, mais incapable d’employ. On vouloit que, par les avantages que celuy-cy feroit à sa femme, il recompensast sa mauvaise mine et son peu d’industrie. Luy, qui ne calculoit point sur ces principes, n’y trouvoit point du tout son compte ; s’il eust suivy son inclination ordinaire, il auroit voulu marchander une femme comme il auroit fait une piece de drap. Mais le petit messer Cupidon fut l’entremetteur de cette affaire. Il l’avoit navré tout à bon, et en mesme temps il l’avoit changé de telle sorte, que, comme il n’y a point de telle liberalité que celle des avaricieux quand quelqu’autre passion les domine, il se laissa brider comme on voulut, accordant plus qu’on ne luy avoit demandé. Le jour est pris pour signer le contract, les amis mandez, et, qui pis est, la collation preparée ; les articles sont accordez et signez d’abord du futur espoux. Quand ce vint à Javotte à signer, le pere, qui avoit fait son compte sur
