Un abit portoit noble et riche
Dent il estoit le mieulz prisiés.
À moi dist : « Amis, escrisiés
» Mon souhet, car je vous en pri. »
Et je, qui pour riens el ne fri,
Que d’oïr telz solas sans fiâiille
Li escris, ensi qu’il le baille.
Je souhede que je soie si fés
En tous estas, en maintiens et en fés
Que par raison doit estre uns amans vrés,
Très envoisiés, lies, amourous et gés,
Et tant avoir en bons deniers tous sés
Que pour payer despens et cous et frès
Que je poroie avoir acquis et fès,
Et que chevance
En nul pays ne me fausist jamès ;
Et de mon corps fuisse ossi armerès
Et ossi preus, pour estre plus parfés,
Com jadis fu Hector ou Acillès ;
Et grasce avoir à Dieu com ot Moysès,
Et acomplis veisse tous souhès
Tels que feroie ; et se fust bonne pes
Par toute France
Et en tous lieus où ferme est no créance ;
Et que cascuns bacelers qui s’avance,
Ou qui en a volonté et plaisance,
Fust avec moi et en ma gouvrenance
