Page:Froissart - Poésies (1829).djvu/460

444

POÉSIES

Tant parlai et si bellement
Que cils, qui assés fellement
M’avoit remonstré, ce m’est vis,
Une grant part de son avis
À moi réconforter s’acorde
L’estat, comment il le recorde.
« Compains, dist il, je partirai
» Et devers vostre dame irai
» Et devers ses pucelles toutes
» Qui ne sont dures ne estoutes,
» Mès d’une accointance très douce,
» Et lor dirai, car le fait touche,
» En quel ardour vous sejournés. »
— « Haro, di-je, très bons jours nés
» Me seroit, s’ensi le faisiés. »
Il me respont : « Or vous taisiés,
» Car ensi le ferai sans faille
» Que presentement le vous baille. »
Il prent congié ; de moi se part ;
Mès encor, ançois son depart
J’avoie une chançon petite
Qui estoit assés bien escrite.
Je le pris, et se li donnai
Et en li baillant ordonnai :
« Vous donrés, de par le malade,
» À ma dame ceste balade,
» Et li dirés, aussi à celles
» Qui sont lès li com ses pucelles,
» Comment je sui en l’ocquison
» De li, embrasés dou tison,