» Et si en moulle-on bouche et mains.
» Aussi tamaintes et tamains
» Voelent bien que leur oreillier,
» Soit pour dormir sus ou veillier,
» Sente la Foze et si l’oudoure.
» Prendés garde où Roze demoure.
» J’appelle un Rosier sa maison.
» Là l’a Diex mis, tout par raison.
» Non pas enclos en une tour
» Mès d’espines poindans au tour,
» À celle fin que les chievrettes
» Qui pastourent bien Violettes
» Et broutent foeilles et jettons
» N’aïent ne Roses ne boutons. »
Atant se teut li advocas
Qui bien ot remonstré les cas
Et sagement, à la samblance
De la Roze vermeille et blance.
La cours aussi un peu cessa,
Pour un tant, que fort on pressa
À savoir se li advocas
De Violette, qui les cas
Avoit oy de Rose belle
Responderoit à la querelle.
Oil voir, vous orés comment
Il respondi moult sagement.
Mès ses responses fault escrire
Avant que je les puisse dire.
