En pensant a vous m’esjoïs
Et entroublie ma dolour.
Ce saciés vous, tres doulz amis,
En pensant, etc.
Ou que je sui, et pour ce dis
Pour trestout, voir, ma douce amour :
En pensant, etc.
rop me faudroit encre et papier,
Se me voloie ensonniier
De mettre tout en souvenance
Les cançons, qui par ordenance
Furent cantées la ce soir ;
Briefment m’en passerai, pour voir,
Car il me fault ailleurs entendre.
Apriès ces danses, sans attendre,
On ala dormir, sus le jour.
La roÿne, en qui toute honnour
Estoit, emmena avoech soy,
Hermondine, si com je croy,
Et les dames de son costé :
Si en a grandement pensé,
Ensi que moult bien le sceut faire.
Et la ducoise debonnaire
De Cornuaille, ce m’est vis,
Et ses maris li dus Patris,
En remenerent leurs enfans
