Dont oïssiés le chevalier
Parler, qui li remoustre ensi :
« Saigremor, biaus filz, je vous di ;
« Vous avés encargié grant painne,
« Quant vous volés vo souverainne
« Faire de dame si jonete.
« En riens ne cognoist la doucete
« Que c’est des dars d’Amours encor.
« Si vous prie, biau Saigremor,
« Ordenés vo coer d’autre part.
« Vous amés trop fort de regart,
« C’est folie que d’ensi faire.
« Vous en poriés vous retraire
« Et remettre ailleurs, dittes moy ? »
Respont Saigremor : « Par ma foy,
« Nennil, ne faire ne le voeil,
« Car sachiés, quoi que je m’en doeil,
« Se m’en sont souvent li penser
« Si joieus au vrai recorder,
« Que moult grandement m’i delite,
« Et mon corage en abilite
« A estre plus chevalereus,
« Plus joli et plus amoureus.
« Se m’i vodrai tenir sans doute,
« Quoi que la painne je redoubte. » f. 192 b
Respont Dagor : « Vous dittes bien.
« Or vous conseil, sur toute rien,
« Que vous le servés loyaument
« Et l’amés enterinement ;
« Si en vaurrés en tous cas mieus
« Entre les jones et les vieulz. »
Dist Saigremor : « Sire, pour voir,
« Je n’eus onques aultre voloir,
« Ne n’avrai tant com je vivrai.
« Telz a Amours me liverai. »
Page:Froissart - Méliador, tome 3.djvu/131
Le texte de cette page a été corrigé et est conforme au fac-similé.
126
Méliador
