Mais entre yaus n’i eut nulles galles, f. 86 c
Quant il ne sceürent bien a dire
En quel lieu il pooient gire.
r n’a ens ou bleu chevalier,
Tant en sachiés, que courecier,
Quant il voit que li jour en vont
Et nul esploit par yaus ne font.
La furent .iiii. jours entiers,
Ou fust envis ou volentiers,
Que onques li dit maronnier,
Pour cose c’on en puist priier,
Ne se porent en mer retraire,
Car il avoient vent contraire,
Mais il n’estoit mies trop fors.
Quant li quatrimes jours fu hors,
Et ce vint sus .i. venredi,
Une barge illuech descendi
De pescheours apriès herens.
Melyador, qui trop dolens
Estoit de ce que la estoient,
Et qu’ensi entre yaus arrestoient
Et ne cognissoient le lieu,
Tant parlerent, non en ebrieu,
Mais en breton biel et a point,
Que cil pescheour sour ce point
Vinrent la, avoeques lor barge.
Melyador adont leur carge
Qu’il li cognoissent verité
Et en quel lieu sont arresté.
Et cil erranment li recordent,
Qui de voir dire ne se tordent,
Et quant Melyador ot ce
Qu’il sont entre Irlande et Escoce,
Si est plus pensieus que devant.
Page:Froissart - Méliador, tome 2.djvu/74
Le texte de cette page a été corrigé et est conforme au fac-similé.
70
Méliador
