« Fors seulement que par parures ;
« Onques ne vi ses armeüres,
« Se droit chi ne les me nommés. »
— « Sire, » dist la dame, « il est telz
« Qu’il s’arme de bleu, ce me samble ;
« Mais sa targe si se dessamble f. 80 d
« D’un soleil d’or, dont il se brise. »
Lors messires Tangis li prise
Le chevalier sur toute riens,
Et dist : « Dame, c’est uns grans biens,
« Quant il est ceens descendus.
« Encontre lui ne s’affiert nuls
« De proece et chevalerie.
« C’est cilz, ne vous en doubtés mie,
« Qui ot le pris devant la Garde,
« Le quel pris li rois Artus garde,
« A ce que j’ay oÿ compter ;
« Car onques ne l’en volt porter,
« Quant au tournoy en fist conqueste.
« Et sachiés qu’en toute no queste,
« Vous ne trouveriés le parel,
« Pour vous pourveïr de conseil
« A ce que vous avés a faire,
« Si com je voi en vostre afaire. »
t quant la damoiselle entent
Le chevalier qui telement
Li prise le bleu chevalier,
Se li dist pour resleecier :
« Sire, le volés vous veoir ? »
Et cilz li respont : « Nennil, voir,
« Car je senc tant de son secré [1]
« Qu’il ne vous en saroit ja gré.
« Si ne me voel jou partir point
« De vous, retenés yce point
- ↑ 10948 senc, B seuc.
