« Que je pourtraioie en .i. role
« De toutes couleurs, ossi bien
« Et par ossi tres grant engien,
« Si com li ouvrier le disoient,
« Que li propre mestre faisoient.
« Ensi me demora d’enfance,
« Chiere dame, ceste ordenance
« Que je ne tieng pas a villainne,
« Non, se vous et ma souverainne
« Ne le me tournés a reproce.
« Ensi, dame, je vous approce f. 157 b
« La matere dont parler voel,
« Comment il n’en poet a mon voel
« Aler, fors a vostre plaisir.
« Quant je peus de jonece issir
« Je me commençai a armer,
« A jouster, et a behourder,
« Et a faire toutes antises
« D’armes et grandes apertises
« Pour mon corps mieulz bouter avant.
« Chiere dame, en ce couvenant,
« Poursieui ou .v. ans ou .vi.
« .I. jour estoit en mon pays
« Et dalés mon signeur mon pere,
« Si oÿ la, c’est cose clere,
« Recorder comment une dame,
« Qui haute honneur le coer entame,
« Avoit une queste mis sus.
« De puis ne m’euist tenu nulz
« Que brief je ne m’i fuisse mis. [1]
« Si me parti de mon pays
« Secretement, sans congiet prendre,
« Ne sçai se j’en fay a reprendre
« A pere et a mere que j’aye,
- ↑ 21329 je ne m’i, B je ne me.
