— « Sire, que vous l’alés veoir,
« Et vous metés en tel parti
« Que vous puissiés parler a li. »
— « A li parler, et par quel voie ?
« Se nullement je le savoie
« Faire, trouver ne aviser,
« Pour tout profondement viser,
« Je le feroie trop volentiers. »
Lors respondi li escuiers :
« Nous y viserons, vous et moy,
« Et regarderons, par ma foy,
« Comment tout ce se pora faire ;
« Car il ne fault en vostre afaire,
« Ce me samble, nulle aultre cose.
« Fols est li homs qui moustrer n’ose
« A sa dame tout son penser.
« Or, prendés en vous a penser,
« Car je pense, saciés pour voir. » f. 148 a
Et cilz qui en voet son devoir,
Faire dou penser grandement,
Pense et s’ordonne telement
Qu’il ne met ailleurs s’estudie.
Saciés, mainte merancolie
Penserent ce jour entre yaus .ii.
Agamanor comme amoureus
Pensoit a coses moult hautainnes,
Et ne ressongnoit nulles painnes,
Ne nulz perilz, que pour la dame
Il peuist recevoir, par m’ame.
Et quant il avoit ce pensé,
Il descouvroit tout son pensé
A Bertoulet son escuier,
Et cilz, pour li esbanoier,
L’arguoit et le corrigoit
Et puis doucement li disoit :
« Sire, ce n’est point li chemins
Page:Froissart - Méliador, tome 2.djvu/319
Le texte de cette page a été corrigé et est conforme au fac-similé.
315
Méliador
