« Jamais ne vous deveriés taire,
« Mais toutdis dire telz paroles
« Ou a danses ou a caroles.
« Or m’en dittes chi encor un. »
Et ceste qui n’est pas en jun
D’estre en solas et en leece,
Afin que la belle y adrece,
Qui d’estre aidie a grant mestier,
Commence .i. peu a busiier
Et s’en vient sus une fenestre.
Phenonée li est sus destre,
Qui joieusement le regarde.
Luciienne point ne se tarde
C’un rondelet ne mette avant,
Qui revenus li est devant.
Le rondelet, je le dirai
Au mieulz que porai ne sarai.
Plaisance en toute douçour
A mon coer en sa baillie ;
C’est pour la tres grant valour
Que cils a a cui m’otrie.
Or m’i tenrai nuit et jour ; f. 145 a
Repentir ne m’en voeil mie.
Plaisance, etc.
Je ne puis faire demour
Mieulz qu’en li, quoi que nulz die.
Si s’affie de m’amour
Qu’il ara toute ma vie.
Plaisance, etc.