« Que, se nulz de moy vous demande,
« Si dittes que je sui passés
« Et pour yaus vous ferés assés,
« Car autre chevalier venront,
« Qui nos routes poursieueront,
« Qui se sont mis o nous en queste.
« N’en faites point plenté d’enqueste. »
Dist Housagres : « Je le ferai,
« Ne ja jour ne me parjurrai
« De tout ce que vous ay prommis ;
« Car je voel estre vos amis,
« Vos chevaliers et vos servans
« Pour obeïr a vos commans.
« Car vous le valés, ce m’est vis,
« De sens, de proece et d’avis. »
A ces mos d’iluec se parti
Melyador sus ce parti,
Et puis se prent a chevaucier
Le droit chemin au Brun Rocier,
Le quel pas .iii. chevalier gardent, f. 140 c
Et saciés que pas ne retardent
Qu’il n’en soient tres bien sogneus.
Melyador comme amoureus,
Lors qu’il fu partis de Housagre,
De coer resjoÿ et halagre
Commança .i. doulz rondelet
A canter ; c’est raisons c’on l’et,
Car il fu amoureus et gens.
Si doit bien plaire a toutes gens,
Qui ont les biens d’Amours senti.
Le dit rondelet veleci.
Page:Froissart - Méliador, tome 2.djvu/289
Le texte de cette page a été corrigé et est conforme au fac-similé.
285
Méliador
