Des dames ne des chevaliers.
Mais cilz qui chevaucoit premiers
Demanda a cesti Tangis :
« Or me dittes, par vostre avis,
« Sire chevaliers, dont vous estes
« Et se vous poursiewés les questes. »
— « Oïl, » respont cilz erranment.
« Mais dont je sui certainnement
« Ne poés vous ores savoir.
« J’en poroie trop mains valoir
« Si mon nom saviés et ma terre.
« Si ne m’en voelliés plus enquerre,
« Mais dittes moy dont vous venés,
« Et se cilz tournois est passés
« Qui fu a Signandon nonciés. »
— « Oïl, » dist cilz, « et bien saciés
« C’on y tournïa ossi bien
« Que, de puis le temps Uriien,
« On oÿ parler de tournoy. »
Respont Tangis : « Moult bien le croi.
« Et a qui fu donnés li pris ? »
— « Par ma foy, sire, il est escris
« A .i. chevalier tres vaillant
« Et moult grandement travillant
« La et ailleurs, il n’est pas doubte. »
Adont mist sen entente toute,
Messire Tangis, dou savoir
De quoi cilz s’arme au dire voir.
On li dist tout incontinent :
« De bleu sont tout si parement
« Et tant y a, dont on le prise, f. 134 a
« D’un biel soleil d’or il se brise. »
Messires Tangis dist adont :
« C’est li chevaliers ens ou mont [1]
- ↑ 18156 ou mont, B ou mond.