Et a le fois ce mot disoit,
Tant l’avoit il enamouré
Et en son coer encorporé,
Et y prendoit si grant plaisir
C’a painnes en pooit issir.
Dont il li avint, ce termine
Qu’il gisoit dedens la courtine
Dou Brun Manoir, ou .ii. mois fu,
Qu’il ot ordenance et argu
De faire .i. jolit virelay
Sus le matere que dit ay.
Quant il l’eut fait, bien li plaisi
Tant que ses vallès l’escrisi
Et se li aida a chanter.
Or se pooient bien vanter,
Quant il estoient entre yaus .ii.,
Que leurs cans estoit gratïeus.
« Et pour .i. tant, » dist li varlès, [1]
« Mon signeur, que vos virelès
« Soit chi chantés a clere vois,
« Entrues que nous sons en ce bois. »
Messires Tangis, sans detri,
Respondi : « Certes, je l’otri. »
Adont entre yaus .ii. s’adrecierent
Et le virelai commencierent,
Par tel maniere et par tel fourme f. 133 c
Que li contre escrips nous enfourme.