« Car point ne fault que vous issiés
« De vo chemin, par nulle voie,
« Sus la cause ou on vous envoie,
« Car je serai li chevaliers
« A vostre dame volentiers,
« Et ne desire riens el, voir,
« Fors que de prestement mouvoir
« Pour aler tantost celle part. »
— « Sire, » dist ceste, « Diex vous gart !
« Vous nous offrés grant courtoisie. »
Dont retournent a chiere lie
Les damoi[se]lles de Valerne,
Et laissent le chemin d’Iberne
Et prendent celi de Norgales.
Melyador, en disant gales
Et faisant cançons et motès,
S’en chevauce avec les varlès
Des damoiselles qui le mainnent,
Et les queles forment se painnent
Dou dit chevalier honnourer
Et leurs besongnes colourer
A le fin que mieulz s’i encline.
Et cilz est si plains de doctrine
Qu’il les conforte grandement
De coer et de grant sentement.
ous lairons de Melyador f. 133 a
A parler, voires, tant c’a or,
Car la matere le desire,
Et parlerons sans contredire
Dou chevalier qui ne peut estre
Au tournoy, ne faire y fenestre,
De Signandon, dessus les prés ;
Car a ce jour estoit navrés
Messire Tangis de Sormale
Page:Froissart - Méliador, tome 2.djvu/259
Le texte de cette page a été corrigé et est conforme au fac-similé.
255
Méliador