Et l’endemain jusc’au diner,
Dont trop esmervilliet estoient.
Tout ensi comme il chevaucoient
Au lés devers Norchombrelande,
Au travers d’une grande lande,
Il voient devers yaus venir
Et leur chemin tout droit tenir
Deus varlès et .ii. damoiselles.
« Assés tost arons nous nouvelles »,
Ce dist Melyador en l’eure.
De puis ce granment ne demeure
Que cil .iiii. moult approcierent,
Et premierement s’adrecierent
Viers Melyador li vassal,
Li quelz estans sus son cheval
Le[s] salua courtoisement
Et leur demanda ensement :
« Damoiselles, ou alés vous ? »
Elles disent : « Biaus sires doulz,
« Nous alons devers Signandon.
« Besongne et aultre cose non
« Nous y mainne, bien le saciés.
« S’il vous plaist, se nous radreciés
« Se noient sommes fourvoiies,
« Car nous y sommes envoiies
« En cause de messagerie. »
Adont Melyador leur prie
Qu’elles voelent dire pour quoi : f. 132 b
« Et saciés, belles, par ma foy,
« Que se je vous puis consillier,
« Pour mon corps assés travillier,
« Je le ferai de grant corage. »
Adont respondi li plus saige
Et dist : « Sire, vous dittes bien.
« Enjoint nous fu, sur toute rien,
« Au partir de nostre maison
Page:Froissart - Méliador, tome 2.djvu/256
Le texte de cette page a été corrigé et est conforme au fac-similé.
252
Méliador
