Si fu tele la cançonnete
Et faite de bon sentement
Que vous orés presentement.
Amis, en vostre compagnie
Ay mis mon coer, gardés le bien,
Pour demorer toute la vie,
Amis, etc.
Si entiere, n’en doubtés mie,
Qu’a li n’a nulz fors que vous rien.
Amis, etc.
n ce propre jour a la feste
Belle Hermondine, et sans requeste,
Canta ce rondelet joli,
Et la estoit d’encoste li
Florée, sa chiere cousine,
Qui retint ce a bonne estrine,
Et dist bien c’amours ouveroient
En li, car si parler moustroient
Comment a le fois y pensoit.
Or esçou bien raison c’on doit
Recorder dou bleu chevalier, f. 132 a
Sitost qu’il se peut esvillier,
Il s’arma et apparilla,
Et a Lansonnet consilla
Qu’il chevaucassent sans sejour.
Si chevaucierent tout ce jour
Sans nulle aventure trouver,
