Et tres amoureusement chainte,
Se departi de sa cousine,
Et li dist ensi Hermondine :
« Cousine, je sui moult pesans,
« Car li jours est ja biaus et grans,
« Et si n’ay encores dormi,
« Dont je vous di en droit de mi
« Que dormir irai un petit. »
Adont se jetta sus un lit,
Et Argentine d’un mantiel
Le couvri, d’ermine moult biel ;
Et de sa cambre se partirent
Celles qui assés bien sentirent
C’un petit estoit travillie.
Hermondine tost consillie
Fu a ce qu’elle s’endormi
Et, si tost qu’elle s’esclemi
Ymaginations li vinrent,
Qui en .i. tel pourpos le tinrent
Que chi vous m’orés regarder.
Elle prist a considerer
L’arroy, le maintien, la samblance
Et la jolie contenance
De Melyador le vassal, f. 131 d
Et comment il est a cheval
Et a piet gratïeus et frices.
Ces pensers [li] furent si riches
Que la belle adont s’eslargi,
A tout ce que elle entendi,
A faire .i. petit rondelet
Et, de corage joliet,
Elle en entra en ordenance,
Et prist ens es mos tel plaisance
Qu’elle les recorda .iii. fois ;
Puis le canta a clere vois
En la cambre toute seulete.
Page:Froissart - Méliador, tome 2.djvu/254
Le texte de cette page a été corrigé et est conforme au fac-similé.
250
Méliador
