« Toutes coses ont leur devoir
« De faire a point et a raison. »
Moult bien de ceste souspeçon
S’en est Melyador pris garde ;
Hermondine adont le regarde
Et li dist : « Il vous fault partir
« Et s’est sans plus ci revenir,
« Car bien croy qu’en aultre contrée
« Serai temprement remenée.
« Or pensés dou bien travillier.
« Je vous tieng pour mon chevalier
« Et vorroie, se Diex me vaille,
« Que faire ne peuissiés faille
« A ce que vous avés empris. »
Melyador, qui fu tous pris
De respondre et voit que partir
Le couvient, ne plus n’a loisir
De demorer, car on li donne
Congiet, ensi comme on l’ordonne,
Dist : « Ma dame, a Dieu vous commant.
« Pour vous me vodrai en avant
« Mettre en toutes painnes de corps ;
« Ou en la queste serai mors
« Ou je venrai a mon entente.
« Mais dittes moy, ma dame gente,
« Se de vous arai plus nouvelles. f. 130 d
« Ce me seroient moult tres belles
« Aventures, se j’en ooie
« Aucunes, se Diex me doinst joie. »
Et Hermondine li respont,
Qui un petit y vise adont :
« Je ne sçai comment ce seroit,
« Ne faire ossi ce se poroit ;
« Car vous irés par les contrées
« Querre aventures et meslées,
« Et je demorrai a l’ostel
Page:Froissart - Méliador, tome 2.djvu/250
Le texte de cette page a été corrigé et est conforme au fac-similé.
246
Méliador