Ne ne doit selon leur requeste,
A nesun chevalier de queste,
Cose qu’elle sace de voir,
Qu’elle n’en face son devoir,
Respont lor assés doucement :
« Oïl, il n’a pas longement
« C’uns chevaliers si com vous estes,
« Je croi qu’il poursieuoit vos questes,
« Jones, amoureus et faitis,
« De blanc et de vert mi partis
« Fu ceens .i. soir a hostel.
« Se nous dist, sans demander el,
« Qu’il doit moult temprement avoir,
« Ensi le fait on a savoir,
« Tout parmi le Norchombrelande,
« .I. tournoy pardessus la lande
« D’Escoce, devant Signandon,
« Et sera ens, ou propre nom
« D’Ermondine, la fille au roy. »
Et quant ce oïrent li doy,
Li chevaliers et ses varlès,
Cescuns fu lors telz et si fes
Que durement et fort pensieu.
« Dame, » dist Lansonnès, « pour Dieu,
« Dittes nous dont a bonne entente
« Se longe sera li attente
« Qu’il faura ceste part aler. »
Et la dame prist a parler
Et dist : « Si com je suis sentans,
« Bien y venrés encor a temps, f. 115 c
« Mais que vous alés celle part. »
— « Dame, » dist Lansons, « Diex vous gard,
« Quant ce nous avés anoncié. »
Ce soir sont ou manoir coucié,
Et l’endemain, au matinet,
Lansonnès lors les selles met.
Page:Froissart - Méliador, tome 2.djvu/188
Le texte de cette page a été corrigé et est conforme au fac-similé.
184
Méliador
