Mon bien, mon coer m’en est doublé
Et j’en sui si bien amendé,
C’on ne poroit mieus amender.
Ma douce dame, etc.
l’eure que li chevaliers
Chantoit ensi sus ces sentiers, f. 111 b
Chevaucoit li chevaliers rouges
Qui n’estoit mies trop harouges,
De qui nous parlerons des or :
C’est messires Agamanor.
Ensi qu’il estoit ens ou bois,
De lonch a entendu la vois
Dou chevalier qui chanté ot.
A Bertoulet a dit .i. mot,
Son escuier : « Or va avant,
« Et si regarde chi devant
« Quel cose c’est que j’ay oÿ. »
Et Bertoulès, sans nul detri,
Chevauce ensi c’on li ot dit.
Il n’a chevauciet c’un petit,
Quant il a celi perceü
Qui point ne l’a aperceü,
Car il avoit mis son hÿaume.
Biertoulès, qui vault .i. royaume
Pour bien servir .i. chevalier,
Esperonne le bon coursier
Et vient au chevalier errant.
Quant il en voit le couvenant,
Si en fu moult esmerveilliés,
Pour ce qu’il est appareillés
De la devise de son mestre.
Adont s’en retourne sus destre
Et a Agamanor revint,
Qui sus la lande quois se tint.
