Que jamais n’en volsist partir.
Sus le jour il ala issir
De la presse, et se trest arriere ;
Si a rapassé la barriere
De la presce qui fu ouverte.
Ensi s’en vint a le couverte,
Ens ou bois, a son logeïs.
Bertoulès en fu resjoïs,
Lors que il le vit revenu.
La ont grant parlement tenu
De la feste et de l’esbanoi.
Ce dist Agamanor : « Par foy,
« Bertoulet, j’ai trop bien ouvré,
« Et si m’as bien servi a gré,
« Quant tu t’accordas a la voie
« Ou j’ai pris et solas et joie. »
Et adonques il li raconte,
De mot a mot, trestout le conte :
Comment dedens la cambre il fu
Avoecques les dames, et u f. 99 a
Li pris fu jugiés et donnés,
Et puis en la sale apportés
Des dames et des damoiselles,
A trompes, et a canemelles
Et a toutes menestraudies :
« Mais je voel que tu estudies
« Sur ce que te dirai encor,
« Car j’ai moult grant mestier desor
« Que je soie bien consilliés,
« Car tout pres et apparilliés
« M’est uns assaus qui me tenra
« Tant que ceste queste durra. »
— « Quelz est il ? » ce dist Bertoulès,
— « Certes, compains, il est si fès
« C’uns drois amans le doit entendre.
« J’ai veü la belle et la tendre,
Page:Froissart - Méliador, tome 2.djvu/123
Le texte de cette page a été corrigé et est conforme au fac-similé.
119
Méliador
