Page:Froissart - Méliador, tome 2.djvu/11

Le texte de cette page a été corrigé et est conforme au fac-similé.
7
Méliador

Lies, plaisans et amoureuses,
Et qui sevent gens honnourer
Trop mieulz c’ailleurs, au vrai parler ;
9565 En ce point sont elles nouries,
Escolées et ensegnies.



Florée, la pucelle gente, f. 70 d
Mist adont grandement s’entente
A honourer tous chevaliers.
9570 Savare, ossi ses freres chiers,
Demorerent ens ou chastiel
De Montgriès, la ou bien et biel
On leur fist ce qu’il demandoient
Et plus avant, car cil estoient
9575 De laiens si tres bien nourri,
Si vaillant et si signouri
Qu’il faisoient sans demander.
Assés bien se prist a saner
Messire Savare, pour voir,
9580 Car grant cure en pooit avoir
Feughins, qui avoit grant desir
Qu’en bon point le peuist veïr.
Lansonnès ossi, d’autre part,
Avoech Florée, que Diex gart,
9585 A Melyador entendirent
Grandement, car forment desirent
Qu’il soit garis bien et a point,
Par quoi il ne sejourne point.
Tant fu poursongniés sagement
9590 Et medecinés doucement,
Qu’il fu gari bien et a droit,
Et dist certes qu’il soufferoit
Bien ses parures a porter,
Et souffera bien le jouster,
9595 Le combatre et le tournoiier.