Empecement et detriance,
Sus bonne et courtoise ordenance.
Quant ce vint au soir, je vous di,
Messires Camels se parti.
Un peu le pria froidement
Florée, a ce departement,
De demorer ; il s’escusa.
Depuis le mot ne releva
La damoiselle tant ne quant.
Camels monta ; il part errant
Et retourne vers son chastiel.
Toute la nuit fist il moult biel,
Car la lune si estoit plainne.
Sus son chemin une fontainne
Avoit ; si tira celle part.
La descendi ; point ne s’en part
Si tretost qu’il y fu venus.
Moult bien scet que nulle ne nulz
N’est dalés lui, la, a ceste heure,
Fors ses varlès qui ne labeure
Pas a ce ou Camelz s’ordonne
Car du tout s’arreste et ordonne
A faire un rondelet plaisant
Et tesmongne bien, en faisant,
Que l’amour la belle Hermondine
A ce faire du tout l’encline.
Je me loe de mes ieuls.
Il ont mon coer bien assené
Dou tout en tout a son talent.
Je ne desir certes mieus,
Car il est dou tout a mon gré.
Je me loe, etc..