Page:Froissart - Méliador, tome 1.djvu/93

Le texte de cette page a été corrigé et est conforme au fac-similé.
13
Méliador

Mais li recorderent tout voir
Et comment il furent le soir
Receü comme chevalier,
410 « Et vous voloient renvoiier
« Le cerf, lequel laissiet avons.
« Mais, monsigneur, nous ne savons
« Se ce vous plaist. » Il respont lors :
« Oïl, par m’ame, et fust fins ors.
415 « Se fait euissiés aultrement,
« Vous m’euissiés trop malement
« Couroucié, sachiés le de voir.
« Mais or va bien a mon voloir. »



Messires Camelz n’atendi
420 Trop longement de puissedi
Qu’il se parti de son manage ;
N’en mena avoech soi c’un page.
De nuit chevauca vers Montgriès,
A une journée la priès.
425 L’endemain, ensi c’on esprime,
Entre heure de tierce et de prime
S’en sont venu au dit chastiel.
Adont estoient au crestiel
Les gardes ; la porte estoit close.
430 Sans congier ouvrir on ne l’ose.
Il appella, on vint a li.
Cognissables se fist ensi
Comme il avoit fait puis .i. mois,
Et dist qu’il estoit de Camois
435 Sires, et Camels avoit nom.
On ne le dist mies de non,
Ni : « Enterés, se c’est vostre aise ». [1]
Mais li fu dit : « Ne vous desplaise :

  1. 437 vostre, B nostre.