Et, quant ce venoit au matin,
On li comptoit sa vie a fin
Que plus ne s’i volsist rabatre ;
Mais c’estoit toujours sans rembatre
Et toutdis a recommencier.
Si osoit il bien chevaucier
Les nuis par forès et par landes,
Et par voies tortes et grandes,
Et entrer en pas perilleus ;
Mais point il n’osoit dormir seulz.
Onques ne perdi cel usage
Tant qu’il vesqui en son eage.
Or vous ay compté la raison
Pour quoi ne volt en la maison
De Montgriès demorer ce soir.
Il ne vosist pour nul avoir
Que on euist laiens sceü
Son afaire ne cogneü.
Si en savoit assés Florée
Par chevaliers de lor contrée
Qui s’en estoient descouvert.
Si tenoit bien Camelz couvert
Sen estat et toutes ses vies,
Et, tant fort amoit ses mesnies,
De lui n’en laissoit nul partir
Ne pour vivre ne pour morir.
essires Camelz, ce saciés,
N’estoit pas encor eslongiés
Une lieue dou dit chastiel,
Quant evous, menant grant cembel,
Venus la les chiens de la cace
Qui sieuois avoient la trace [1]
- ↑ 370 sieuois, B sieuoit.