La li disent, par mos exprès,
Comment il leur est avenu.
Adont n’a on plus attendu :
Li .xii. esliseur mandé furent,
Car a ce recort estre durent,
Et la disent li chevalier,
Moult liement, sans menchongier :
« Biau signeur, il vous fault escrire
« En escript ce qu’il voelent dire ;
« Premiers toute leur aventure. »
Et puis revient li escripture
As proeces, de cief en cor,
Dou chevalier au soleil d’or ;
Comment par li est desconfis
Messires Camelz et occis,
Et yaus delivré de prison.
Ceste aventure bien prise on, [1]
Et en font la entre yaus grant feste,
Et dient qu’en toute la queste,
Toutes coses mises ensamble,
N’en y a nul qui le ressamble
De renommée ne de pris.
Quant on ot tous les mots escrips
Et registré en un papier,
Congiet eurent le chevalier
D’yaus armer et de traire avant,
Ensi qu’il ont alé devant.
Si partirent de Carlïon,
Environ une Ascention,
Et se s’i misent tout en queste
Pour faire aucun nouvel conqueste
D’armes, qui les puist avancier f. 69 b
Ensi comme bon chevalier.
- ↑ 9348 prise on, B prison.
