Cescuns feri en son blason
Son compaignon si roidement,
Que les lances, tout droitement,
En tronçons des mains lor volerent,
Mais ens es targes demorerent
Li fier qui as tronçons tenoient.
Oultre passent et, quant il voient
Que les lances leur sont perdues,
Si ont trait les espées nues
Et se requierent a plains bras.
Sorelais n’estoit mies cras,
Mais chevaliers bien aligniés.
Nulz ne s’est noient espargniés
Au bon tournoiier des espées.
Melyador, qui les pensées f. 54 d
Ot tout dis forment honnourables,
Voit que cilz chevaliers est ables
Et qu’en armes bien se manoie.
Sachiés que pas ne l’en anoie
Mais l’en prise moult grandement,
Et, quoi qu’il euist hardement
De parfurnir ceste meslée,
Il s’apoia sus sen espée
Et se retrait .i. peu arrier,
Et demande au dit chevalier
Que, par Amours, li voelle dire
Quel cose le muet et le tire,
Ne a tiret, en ceste cace,
Et, s’ensi est que il le sace,
Il li dira secondement
Partie de son sentement,
Tant que par honneur en pora [1]
Dire, ne ja n’en mentira.
Sorelais, qui se voit priiés,
- ↑ 7414 en pora, B on pora.
