— « C’est assés, dit Dagorisès,
« Je n’en voel plus oïr hui mes.
« A demain, se li temps l’ordonne,
« J’arai quelque aventure bonne. »
Ensi laissierent le parler.
Si s’en peurent couchier aler
Et dormirent jusc’au matin.
Ensiellé furent li roncin
Et la cose toute aprestée.
Dagorisès a çaint l’espée f. 41 c
Et puis monta sus son coursier.
Congiet a pris au chevalier,
Quant il l’ot ens ou chemin mis.
Or chevauce gais et jolis
Li chevaliers au rouge escu.
Supposés vous qu’il ait vescu
Jusc’a ores sans bien amer ?
Nennil, voir, j’ose bien jurer
Que de ce a assés sa part,
Car, lors que dou chevalier part
Qui liement l’eut recueilli,
Il entre en .i. pourpos joli,
Et fist .i. rondelet moult gent,
Le quel il chanta en present,
De liet coer et a haute vois,
En costiant l’ombre dou bois.
Ma douce dame souverainne,
Ne me voelliés ja oublier,
Car ja ne vous oublierai.
De moi poés estre certainne
Que vostre sui, c’est sans doubter.
Ma douce, etc.
