Page:Folengo - Histoire maccaronique de Merlin Coccaie, 1859.djvu/89

le Resane, et entrent dans la courtoise ville de Mantoüe : Mantoüe, dis-je, qui autrefois a esté bastie par les Diables Mantois. Icelle pour lors estoit languissante sous l’inique tyran Gaïoffe, extraict et conchié d’une lasche famille. L’entrée de cette ville est la porte qu’on surnomme de Lyonne. En icelle se tenoit lors Sordelle, Prince le Goit, et Baron de Volte, et qui possedoit tout le territoire de Caprian. Cestuy-cy avoit autrefois gagné en duel et en plusieurs tournois mille prix, tant par les Gaules, par les Allemagnes, par les Espagnes, que par tous les Royaumes des tyrans, depuis le Rhin jusques à l’Empire. du Sophi. Mais iceluy, pour lors estant parvenu en un aage fort caduc pour le grand nombre d’années qu’il avoit, et estant chastré, ne faisoit plus que donner conseil aux autres. Guy, entrant avec sa pauvre femme, apperçoit Sordelle estant encor fort membru, et se tenant lors debout devant la porte de son beau et haut Palais, auquel autresfois les descendans de l’ancien Grignan avoient fait leur demeure. Incontinent Guy recogneut son compagnon d’armes ayans esté ensemble en plusieurs batailles contre les Tures et les Mores : mais toutefois, ne voulant se faire cognoistre à luy, se destourne, et, baissant le visage, prend soudain la rue, qui tire à la porte de S. George, et par icelle sort de la ville. N’ayans faict gueres plus d’un mille, ils se trouvent d’aventure près d’une grande ville, presque en grandeur pareille au Cathay, et, pour le trafic des deniers et marchandises, ressemblant à Milan ; laquelle on appelle Cipade, pour estre située au delà du Pade, autrement dit Po. Icelle, à l’occasion de ses grands Paladins, fait retentir sa renommée jusques au ciel, traverse tout le monde, et descend jusques au Royaume des Diables. Mais, combien que d’icelle fussent sortis mille vaillans personnages, soit pour gaigner le prix des tournois, soit pour combattre à cheval, ou à pied, Cipade neanmoins a tousjours esté douée de meschans. Veronne donne grande quantité de laine de ses brebis et moutons ;