que les termes environnent : ainsi la ligne terminée par deux poincts, n’eſt pas dite figure : mais toutes ſuperficies, & ſolides, finis & limitez, ſont nommez figures, pource qu’ils ſont environnez d’un ſeul, ou de plusieurs termes : d’un ſeul, comme le Cercle, l’Ellipse, & la Sphere : de pluſieurs, comme le triangle, le quarré, le cube, la pyramide, &c.
15. Cercle, eſt une figure plane, contenue par vne ſeule ligne qu’on appelle circonference, vers laquelle toutes les lignes droictes menées d’un ſeul poinct de ceux qui ſont en icelle figure, ſont égales entr’elles.
16. Et ce poinct-là eſt appellé centre du cercle.
De toutes les figures planes, la plus parfaicte eſt le cercle, lequel, selon que le definit icy Euclide, est une figure plane contenue & environnee d’une ſeule ligne, à laquelle toutes celles me-
nees d’un ſeul poinct de ceux qui ſont dedans la figure, ſont égales entr’elles : & cette ligne là s’appelle periphere, ou circonférence du cercle, & du ſusdict point, centre du cercle : Comme par exemple, si une ſuperficie ou eſpace eſt environnee d’une ſeule ligne ACE, & que de quelque poinct d’au-dedans d’icelle, comme de F, toutes les lignes droictes menees au terme ou circuit ACE, comme FA, FC, & FE, ſont égales entr’elles : telle figure plane ſera appellee cercle, & le terme ou ligne ACE, qui circuit & enuironne icelle figure, s’appellé periphere, ou circonférence du cercle : mais ledit poinct F, est nommé centre du cercle.
Quelques Geometres definiſſent autrement le cercle, & disent que c’est une figure plane, deſcrite par une ligne droicte finie, laquelle ayant un des points extremes fixe, est meuë à l’entour d’iceluy iusques à ce qu’elle retourne au meſme lieu où elle a commencé à mouvoir : comme ſi la ligne droicte AF ayant le poinct F fixe, eſt entendue ſe mouvoir à l’entour d’iceluy poinct F, tirant de A vers C, E, iusques à ce qu’elle revienne au meſme lieu FA, où elle a commencé ſon mouvement, elle deſcrira par iceluy mouvement le cercle ou espace ACE, duquel la circonférence eſt deſcrite & traſſee par le poinct mobile A ; & le poinct fixe F, est le centre d’iceluy cercle, duquel centre toutes les lignes droictes menées à la suſdite circonference ACE, ſont egales entr’elles, puis qu’elles proviennent toutes d’une seule & meſme meſure, c’est à ſçavoir de la ligne FA.
17. Diametre du cercle, eſt une ligne droicte menée par le centre du cercle, & finiſſant de part & d’autre à la
