Cette page a été validée par deux contributeurs.
ÉNIGME IOYEVSE POVR
les bons eſprits.
SONNET.
E ſuis long d’vn eſpan, delicat, rond & blanc,
Ayant deuers le bas la pointe vn peu groſſette :
Madame m’a ſans ceſſe, ou auoir me ſouhaitte
Entre ſes jeunes doigts, ou aupres de ſon flanc.
Bien ſouuent & touſiours quaſi elle me prend,
Et dans le creux ouuert d’vne motte doüillette
Peluë tout au tour, rebondie & molette,
Ioyeuſe elle me met, puis ſoudain me reprend.
Pour me rendre plus prompt, plus diſpoſt & habile,
D’vne mine affetee & grace fort gentile,
Elle crache ſur moy & m’en frotte à l’entour.
Ie ſuis ſon ſeul plaiſir, je ſuis ſa contenance,
Mais las ! ſi reboucher il m’aduient quelque jour,
Pour tout jamais je ſuis banny de ſa preſence.
