choses ; et ce que l’en voit as eaus[1] ne poent-il apercevoir, si qu’il ne poent entendre le ordenement des natures que Dex a fait en ses créatures ; mes est pris talenz de espondre en romanz aucuns des secrès de Astronomie, sicum li philosophe et li autour en traitèrent ça en arrière, qui estoient délivré des terriens pensers, et tote leur entente metoient en enquerre la vérité de tote philosophie.
» Et porce que je auré assez détraeors[2] et enuious en cest œvre, la quèJe je ne faz mie por les rudes et por cels qui ont l’entendement gros, mes por cels qui, jà soit-ce qu’il ne s’aient fondé de profonde clergie, il ont neporquant l’entendement soutil, prigie que cest œvre ne soit balliée commune ne abandonée à touz, mes à cels solement qui ont bon entendement et soutil engin.
» Et voel premièrement commencier des paroles que Ptholemeus met ès prologue de son livre qui est apelez Almageste, qui einsi commencent :
» Dex, li faisières del Monde, voult[3] le ordre de descendre en totes choses del Très-Haut. Or est de lui meismes à ses souraines créatures et as sourains cors, et des sourains cors as choses et as créatures de ça desouz. Et por ce, volt et ordena que sa volenté descendist premièrement de Lui as cors et as créatures célestians et diluèques, as choses ça desouz ; por laquèle chose, il balla, par devin consuel, toute la région de la terre à l’arbitre del ciel ; et, sicum li Pères qui avoit et a pitié de ses créaturez, il balla et commist toutes les terrianes choses et lor fortunes à la foi et à la porvéance des créatures et des cors célestians.
» Quar li Maistres Ouvriers de toutes choses, qui avoit, en l’œvre del ciel, dignement et deurment laboré, volt que, devant totes les autres choses de ça desouz, einsi cum il avoit establi le ciel el plus haut leu, eust privilège et dignité sour totes les choses terrianes. Et por ce, il li dona le don de tote beauté ; et li dona poessance et vertu, porce que il devoit estre mis governierres, par desoz lui, sor totes les choses souzgiètes ; il li dona mouvement raisonable ; il li dona vertu de lumière, et li commist les natures et le muement des choses de ça desouz, autresi comme à un gouverneour de sa volenté, porce que nule chose ne défausist en si grant ovragne cum est la machine, ce est la façons, del Monde.
