sanz ordre, diversement, et vont ou tornent les uns raiz de ça et les aultres de là ; et pour ce, tel corps n’est pas miroer représentent figure, combien qu’il représente coleur ou lumière.
» Item. Autres corps sont diafennes ou transparens ou cleirs, sicomme sont verre ou cristal et eaue ; et en telz corps se profonde la lumière, et perse, et passe tout oultre se ils ne sont profons et espez ; et doncques, selon ce que ilz sont transparans ou cleirs plus ou moins, selons se, se profonde en eulz la lumière plus ou moins, et fait telz corps estre visibles.
» Item. La Lune est corps spérique parfaitement poli, sicomme il sera dit après ou XXe chapitre ; et doncques, par ce que dit est, si elle feust corps non transparant et obscur, sicomme en fer ou acier, elle représentast la lumière du Solail en manière de miroer ; et devant est monstré que non fait ; pourquoy il s’ensuit qu’elle est corps transparant et cleir comme seroit cristal ou veirre, au moins ès parties qui sont vers la superficie d’elle ; et ouvecques ce, telz corps sont aucunement obscurs.
» Et en oultre il s’ensuit que la lumière du Solail se profonde en la Lune aucunement ; mès elle ne perse ou ne passe pas tout oultre, pour la grande quantité ou profondeur du corps de la Lune ; mès ceste lumière entre dedans bien peu ou regart de la quantité de la Lune. Car auxi nous voions que, parmy eaue qui est bien cleire, si elle est moult profonde, la lumière du Solail ne descent pas siques au fons.
» Item. Si la Lune estoit équalement transparente ou cleire ès parties desquelles qui recevent ceste lumière, elle seroit équalement en lumière en une partie comme en l’autre ; et le contraire appert par la taiche ou figure que nous voions.
» Et doncques convient-il que les parties de la Lune, de leur propre nature, ne soient pas toutes semblables et uniformes, ne équalement transparentes ou cleires, mès différemment, auxi comme nous voions aucunes différences en ciel en aucunes autres parties ; et c’est la cause de la taiche et apparence dessus dicte.
» Mès l’en doit savoir que auxi comme une pierre de albastre, les vaines et parties qui sont plus cleires et parmys lesquelles l’en verroit auxi comme parmy cristal, icelles semblent plus obscures et moins blanches que les autres, semblablement est des parties de la Lune. Et donc, de tant comme elles sont plus obscures aucunes, et que la lumière du Solail se profonde plus en elles, de tant apparoissent-elles plus obscures, et les autres
