voy point que ce treſnoble royaume de France, aiant inſeparablement marié à ſa coronne, noſtre Normãdie, ne doiue admetre le bon lãgage d’icelle (qui n’eſt à vray dire que le ſien meſme ) auſsi bien que toutes les autres choſes. Car ſ’il deigne bien receuoir nos hõmes au ſeruice de ſes guerres, & admetre nos deniers en to ſes afaires, pourquoy dedeignera-il vne douzaine, peut eſtre, de bõs mos Normans, portãs ſa meſme liurée, & aſsés connus pour ſiens, veu que à tout propos il en emprunte mille barbares & étrangers, voire des mains meſme de ſes ennemis ? Or, pour l’orthographe, ſ’entrebatent les Grammariens tãt qu’il leur plaira : Ie trouue les nouuelles raiſons eſtre les meilleures, ſi le plus cõmun vſaige leur auoit donné ſon conſentement. Car par elles, le vray ſon de nos paroles pourroit demourer plus fidelement à iamais repreſenté. Mais quant à moy, ne preſumant point que mes opuſcules ſoient pour paſſer à vne poſterité, ie ne me ſuis point beaucoup ſoucié de changer ainſi rigoureuſement toute l’écriture acoutumée, & ay permis aus Libraires ſ’y gouuerner à leur poſte : me doutant bien, que mille autres vices, lours & grans aſſez en ce petit liure, ne te donneront loiſir (ô lecteur) d’arreſter ton œil ſur telle maniere de legeres fautes.
Page:Doublet - Élégies, 1559.djvu/4
Le texte de cette page a été corrigé et est conforme au fac-similé.
In Giouenil faillir é men vergogna.
