ſorte qu’ils eſtonnoient les ſpectateurs, & après s’eſtre longuement battus ſe repoſoient par vn certain temps, puis retournoient en batterie, & leur combat tenoit deux heures.
Le vingtſiefme dudit mois ils combatirent à pied, & ſe chamaillerent de telle ſorte qu’il ſembloit des forgerons qui battoiét ſur l’enclume, le l’endemain ils ſe trouuerent eſtre à cheual, & faiſoient voltiger leurs cheuaux, comme gens de guerre, puis ſe chamaillerent de telle ſorte, que l’on euſt dit que l’vn ou l’autre tomberoit à bas : Et le iour enſuiuant l’on euſt dit pour certain que chacun d’eux eſtoit emparé d’vn bouleuert, ou fortereſſe, & apres auoir fait aſſez bonne mine l’vn contre l’autre, il ſe fit bruict cōme de quelques tirées de canon, le bruict eſtoit ſi effroyable qu’il ſembloit aux auditeurs eſtre la fin du monde : Puis ayant continué leſdits iours l’eſpace de ſept heures, tout en vn inſtant vne nuë eſpoiſſe apparut en l’air, & couurit ſi obſcurément, que rien de deux heures ne parut que nuees & broüillards
