Getez, frans huem ! mar s’en ira ! ’
E il geta, si la feri,
que la florete li cheï.
La dame lieve, si la prent.
1060 Ariere va hastivement.
Dedenz la buche a la pucele
meteit la flur ki tant fu bele.
Un petitet i demura,
cele revint e suspira ;
1065 aprés parla, les uiz ovri.
’Deus’, fet ele, ’tant ai dormi ! ’
[Bl. 180c] Quant la dame l’oï parler,
deu cumença a mercier.
Demande li ki ele esteit,
1070 e la meschine li diseit :
’Dame, jo sui de Loengre nee,
fille a un rei de la cuntree.
Mult ai amé un chevalier,
Eliduc, le bon soldeier.
1075 Ensemble od lui m’en amena.
Pechié a fet qu’il m’engigna !
Femme ot espuse, nel me dist
ne unkes semblant ne m’en fist.
Quant de sa femme oï parler,
1080 de duel que oi m’estut pasmer.
Vileinement descunseilliee
m’a en altre terre laissiee.
Traïe m’a, ne sai que deit.
Mult est fole, ki hume creit ! ’
1085 ’Bele’, la dame li respunt,
’n’a rien vivant en tut le munt
ki joie li feïst aveir ;
1056 H se ira
1056 franc humme — 1058 floret — 1062 que — 1063 demurra —
1065 oilz oueri — 1066 Deu — 1068 cumeucat — 1071 Logres — 1073 Mut — 1074 soudeer — 1076 Peche ad ; kil menginna — 1078 unc — 1080 ke ; mestuet paumer — 1081 descunseillee — 1082 mad ; autre tere laissee — 1083 Trahi mad ; quei — 1084 Mut ; que humme — 1086 nad — 1087 que
