735 Grant travail m’estuvra sufrir,
ainz que jeo puisse revenir.
Ja, des i que revenuz seie,
n’avrai joie de rien que veie ;
kar ne vueil ma fei trespasser.’
740 A tant le lait la dame ester.
Elidus od sun seignur fu.
Mult li a aidié e valu ;
par le cunseil de lui errot
e tute la terre guardot.
745 Mes quant li termes apreça,
que la pucele li numa,
de pais faire s’est entremis :
tuz acorda ses enemis.
Puis s’est apareilliez d’errer
750 od quel gent il voldra mener.
Ses dous nevuz qu’il mult ama
e un suen chamberlenc mena
(cil ot de lur cunseil esté
e le message aveit porté)
755 e ses esquiers sulement ;
il nen ot cure d’altre gent.
A cels fist plevir e jurer
de tut sun afaire celer.
En mer se mist, plus n’i atent.
760 Ultre furent hastivement.
En la cuntree est arivez,
u il esteit plus desirez.
Elidus fu mult veziëz,
[Bl. 178b] luin des hafnes s’est herbergiez :
765 ne voleit mie estre veüz
ne trovez ne recuneüz.
750 H e — 751 H Deus ses — 756 H not (—1) — 761 H esteit (+1)
735 mestuuera suffrir — 737 de si ; reuenu — 738 nauerai — 739 uoil — 740 lest — 741 Eliduc — 742 Mut ; ad aide — 744 tere gardot — 747 fere — 749 appareille de errer — 750 queile ; uodra — 751 deus ; mut — 756 dautre — 757 ceus — 760 Vtre — 763 Eliduc ; mut veiziez — 764 herbergez — 766 reconuz
