XXVII.
Elle pleuroit toute palle de crainte,
Lors que la mort ſa moitié menaſſoit,
Et tellement l’air de cris rempliſſoit,
Que la Mort meſme à pleurer euſt contrainte.
Helas mon Dieu que ſa grace eſtoit ſainte !
Que beau ſon teint qui les lis effaçoit !
Le trait d’Amour cependant me bleſſoit,
Et dans mon ame engrauoit ſa complainte.
L’Air en pleurant ſa douleur teſmoigna,
Le beau Soleil de pitié ſ'eloigna,
Les Vens eſmeus retenoyent leurs halaines :
Et ſur la terre où tomberent les pleurs
De ſes beaux yeux, amoureuſes fontaines,
Tout ſ'eſmailla de verdure & de fleurs.
XXVIII.
Ie ne me plains de voſtre cruauté,
À mes deſirs iniuſtement contraire :
Ie ne me plains que tout me deſeſpere
Ny que le tans cede à ma loyauté.
Ie ne me plains du vol que iay tenté,
Ieune Dedale, aux perils temeraire,
Quoi qu’il en ſoit, i’auray de quoy me plaire,
Fondant aux rais d’vne telle beauté.
Ie ne me plains que l’effort des ialoux
De moy me priue en me priuant de vous :
Ie ne me plains que tout me face craindre !
Mais en ſouffrant tant de punitions,
De deſeſpoirs, de mors, d’afflictions,
Las ie me plains que ie ne m’oſe plaindre !
