y mordre, non. Davantage[1], le front tetrique[2] icy trouvera dequoy desrider sa severité et rire une bonne fois, tant gentille est la grace que nostre autheur ha à traiter ses faceties. Les personnes tristes et angoissées s’y pourront aussi heureusement recreer, et tuer aisément leurs ennuys. Quant à ceux qui sont exempts de regret et s’y voudront esbatre, ilz sentiront croistre leur plaisir en telle force que le rude chagrin n’osera entreprendre sur leur felicité, se servans de ce discours comme d’un rampart contre toute sinistre[3] fascherie. De faire à nostre aage offre de chose tant gentille, je l’ay estimé convenable, mesmement en ces jours tant calamiteux[4] et troublez. Vostre office sera (debonnaire Lecteur) de le recevoir d’une main affable[5], et nous sçavoir gré de nostre travail ; lequel sentans bien receu, serons excitez à continuer en si louable exercice, pour vous faire jouyr de choses plus ardues et serieuses. Adieu. De Lyon, ce 25 de janvier 1558.
HOMMES pensifz, je ne vous donne à lire
Ces miens devis, si vous ne contraignez
Le fier maintien de voz frons rechignez :
Icy n’y ha seulement que pour rire.
Laissez à part vostre chagrin, vostre ire,
Et vos discours de trop loing desseignez[7].
Une autre fois vous serez enseignez :
Je me suis bien contrainct pour les escrire.
J’ay oublié mes tristes passions,
J’ay intermis[8] mes occupations.
Donnons, donnons quelque lieu à folie ;
Que maugré nous ne nous vienne saisir,
Et en un jour plein de melancholie,
Meslons au moins une heure de plaisir.
- ↑ De plus, en outre.
- ↑ Triste, chagrin, morose ; tetricus.
- ↑ Dans les autres éditions : inopinée.
- ↑ Dans les autres éditions : calomnieux.
- ↑ Dans les autres éditions : courtoise.
- ↑ Ce sonnet, qui est de Des Periers plutôt que de son éditeur, Nicolas Denisot, manque dans quelques éditions.
- ↑ Pour : dessinés.
- ↑ Interrompu.
